اتستەكتەر ەلىنەن كەلەتىن 23 فۋتبولشىنىڭ اراسىنان رافاەل ماركەستى ەرەكشە اتاپ وتۋگە بولادى. 39 جاستاعى جارتىلاي قورعاۋشى كەزىندە فرانتسيانىڭ «موناكو» جانە يسپانيانىڭ «بارسەلونا» كلۋبتارىندا ويناپ, اتالمىش كوماندالار ساپىندا تالاي تولاعاي تابىسقا قول جەتكىزدى. سونىمەن قاتار, ماركەس 2002, 2006, 2010 جانە 2014 جىلدار جالاۋى جەلبىرەگەن الەم چەمپيوناتتارىندا شەبەرلىگىمەن كوزگە ءتۇستى. سول بايراقتى باسەكەلەرگە ول جاي عانا قاتىسىپ قويماي, كوماندا كاپيتانى رەتىندە ءوز ارىپتەستەرىن جاسىل الاڭعا شىعاردى. ەندى رافاەل ماركەستىڭ ەسىمى دۇنيەجۇزىلىك دوپ دوداسىندا بەس مارتە ونەر كورسەتكەن ويىنشى رەتىندە سپورتتىق شەجىرەگە التىن ارىپتەرمەن جازىلماق. ال فۋتبول تاريحىندا ءدال سونداي قۇرمەتكە بولەنگەن نەبارى ءتورت-اق ادام بار!
بۇل كوشتى داڭقتى انتونيو كارباحال باستاپ تۇر. ول 1950, 1957, 1958, 1962 جانە 1966 جىلدارى وتكەن الەم چەمپيوناتتارىندا مەكسيكا قۇراماسىنىڭ قاقپاسىن قورعادى. ەكىنشىسى – لوتار ماتتەۋس. گەرمانيانىڭ ماقتانىشى 1982, 1986, 1990, 1992 جانە 1998 جىلدارى وتكەن جارىستاردا جاسىل الاڭدا جاسىنداي جارقىرادى. ءۇشىنشىسى – دجانلۋيدجي بۋففون. ايگىلى قاقپاشى 1998, 2002, 2006, 2010 جانە 2014 جىلدارى ونەر كورسەتتى. بۋففوننىڭ رەسەيدەگى دوداعا قاتىسۋعا دا نيەتى بولدى. الايدا شەشۋشى تۇستا شۆەتسياعا جول بەرگەن يتاليا قۇراماسى تورتجىلدىقتىڭ باستى جارىسىنىڭ جولداماسىنان قاعىلدى.
عالىم سۇلەيمەن,
«ەگەمەن قازاقستان»
